ಮಕ್ಕಳಿಗಾಗಿ ಪ್ರಾರ್ಥನೆ

ಮಕ್ಕಳಿಗಾಗಿ ಪ್ರಾರ್ಥನೆ

ಪರಲೋಕದಲ್ಲಿರುವ ನಮ್ಮ ತಂದೆಯೇ, ನಿನ್ನ ನಾಮಕ್ಕೆ ಮಹಿಮೆ ಉಂಟಾಗಲಿ! ಯೇಸುವೇ, ನೀನು ನಮಗೆ ಅನುಗ್ರಹಿಸಿದ ಸಂತಾನಕ್ಕಾಗಿ ನಿನಗೆ ವಂದನೆ! ನೀನು ನಮಮ್ನ್ನು ನಂಬಿಗಸ್ತರು ಎಂದು ಎಣಿಸಿ ನಮ್ಮ ಕರಗಳಲ್ಲಿ ನೀಡಿರುವ ಮಕ್ಕಳಿಗಾಗಿ ನಿನ್ನ ಸಮ್ಮುಖದಲ್ಲಿ ಪ್ರಾರ್ಥಿಸುತ್ತೇವೆ. ಕರ್ತನೇ ನಮ್ಮ ಮಕ್ಕಳನ್ನು ಆಶೀರ್ವದಿಸು, ಅವರು ನಿನ್ನನ್ನು ಅರಿತು ಆಸಕ್ತಿಯಿಂದ ನಿನ್ನ ಮಾರ್ಗವನ್ನು ಅನುಸರಿಸುವಂತೆ ನಿನ್ನ ಮುಖ ಪ್ರಸನ್ನತೆ ಅವರ ಮೇಲಿರಲಿ! ನಿನ್ನ ಮಕ್ಕಳು ಎಣ್ಣೆಮರದ ಸಸಿಗಳಂತಿರುವರು" ಎಂಬ ವಾಕ್ಯದ ಪ್ರಕಾರ ಇವರು ನಿನ್ನ ಅಂಗಳದಲ್ಲಿ ನೆಡಲ್ಪಟ್ಟು ಈ ಭೂಮಿಯಲ್ಲಿ ನಿನಗೆ ಹೇರಳವಾದ ಫಲಕೊಡುವಂತೆ ನಿನ್ನ ವಾಕ್ಯದ ಅಸ್ತಿವಾರದ ಮೇಲೆ ಇವರ ಜೀವಿತವು ಕಟ್ಟಲ್ಪಡಲಿ, ಕರ್ತನೇ ಸಕಲ ಜ್ಞಾನವಿವೇಕಗಳು ಇವರಿಗೆ ಉಂಟಾಗುವಂತೆ ದೇವಭಯವು ಇವರ ಹೃದಯವನ್ನು ಆಳ್ವಿಕೆಮಾಡಲಿ, ಯೌವ್ವನ ಪ್ರಾಯದಲ್ಲಿ ಮಾರ್ಗತಪ್ಪಿ ಹೋಗದಂತೆ ಪರಿಶುದ್ದತೆಯನ್ನು ಕಳೆದುಕೊಳ್ಳದಂತೆ ಬೇಲಿಯಿಟ್ಟು ಕಾಯಬೇಕಾಗಿ ಪ್ರಾರ್ಥಿಸುತ್ತೇವೆ. ನಿನ್ನನ್ನು ಸೇವಿಸುವದರಲ್ಲಿ ನಾವೇ ಅವರಿಗೆ ಮಾದರಿಯಾಗಿರುವಂತೆ, ನಿನ್ನಲ್ಲಿ ಭರವಸೆಯಿಟ್ಟು ಕೆಟ್ಟದ್ದನ್ನು ತೊರೆದು ಸನ್ಮಾರ್ಗದಲ್ಲಿ ನಡೆಯುವವರು ಹೊಂದುವ ಪ್ರತಿಫಲಕ್ಕೆ ನಾವೇ ಅವರಿಗೆ ಸಾಕ್ಷಿಯಾಗಿರುವಂತೆ ನಮಗೆ ಕೃಪೆಯನ್ನು ಅನುಗ್ರಹಿಸು! ಕರ್ತನೇ ಅವರ ಭವಿಷ್ಯವು ನಮ್ಮ ಹೃದಯ ಬಯಕೆಯಂತೆಯೋ ಅವರ ಸ್ವಂತ ಆಲೋಚನೆಯಂತೆಯೋ ಇಲ್ಲದೆ ಸಂಪೂರ್ಣವಾಗಿ ನಿನ್ನ ಚಿತ್ತದಂತೆಯೇ ರೂಪಿತವಾಗಲಿ. ನಿನ್ನ ನಿರೀಕ್ಷೆಯನ್ನು ಭಂಗಪಡಿಸಿ ನಿನ್ನ ಮಾರ್ಗದಿಂದ ಇವರನ್ನು ದಿಕ್ಕುತಪ್ಪಿಸಲು ಪ್ರಯತ್ನಿಸುವ ಸೈತಾನನ ಪ್ರಯತ್ನಗಳನ್ನು ಶಪಿಸುತ್ತೇವೆ! ಸೈತಾನನ ಕುತಂತ್ರಗಳು ನಾಶವಾಗಲಿ! ನಿನ್ನ ಮಾರ್ಗದಲ್ಲಿ ಮುಂದುವರೆಯದಂತೆ ತಡೆಮಾಡುವ ಮನುಷ್ಯ ಸಹವಾಸಗಳು, ದೈವೀಕ ಚಿತ್ತವಿಲ್ಲದೆ ಆತ್ಮೀಕ ಬಂಧುಗಳು ಕಡಿಯಲ್ಪಡಲಿ. ನಿನ್ನ ಚಿತ್ತಕ್ಕೆ ವಿರೋಧವಾದ ಕಾರ್ಯಗಳನ್ನು ನಮ್ಮ ಮಕ್ಕಳ ಜೀವಿತದಲ್ಲಿ ನಾವು ನಿರಾಕರಿಸುತ್ತೇವೆ! ಅವುಗಳನ್ನು ನಾವು ಅನುಮತಿಸುವುದಿಲ್ಲ! ಕರ್ತನೇ ನಮ್ಮ ಮಕ್ಕಳು ಆತ್ಮೀಕವಾಗಿಯೂ, ಶಾರೀರಿಕವಾಗಿಯೂ,

ಸಾಮಾಜಿಕವಾಗಿಯೋ ,ಆರ್ಥಿಕವಾಗಿಯೂ, ರಾಜಕೀಯವಾಗಿಯೂ ಅಭಿವೃದ್ಧಿ ಹೊಂದಿ ಈ ಭೂಮಿಯಲ್ಲಿ ನಿನ್ನ ನಾಮವನ್ನು ಮಹಿಮೆಪಡಿಸುವವರಾಗಿಯೂ ನಿನಗೆ ಸಾಕ್ಷಿಗಳಾಗಿಯೂ ಜೀವಿಸುವಂತೆ ಅನುಗ್ರಹಿಸು! ನಮ್ಮ ಮಕ್ಕಳ ವಿದ್ಯಾಭ್ಯಾಸವನ್ನೂ / ದುಡಿಮೆಯ ಪ್ರಯತ್ನಗಳನ್ನು ಆಶೀರ್ವದಿಸು, ಆರೋಗ್ಯವನ್ನೂ, ಬಲವನ್ನೂ ನಿನ್ನ ಚಿತ್ತವನ್ನು ಭೂಮಿಯಲ್ಲಿ ಪೂರ್ಣಗೊಳಿಸುವವರೆಗೂ ದೀರ್ಘಾಯುಷ್ಯವನ್ನೂ ಅನುಗ್ರಹಿಸು. ನಮ್ಮ ಪ್ರಾರ್ಥನೆಗಳನ್ನು ಕೇಳಿ ನಮ್ಮ ಮಕ್ಕಳನ್ನು ಆಶೀರ್ವದಿಸಿದ್ದಕ್ಕಾಗಿ ನಿನಗೆ ವಂದನೆ! ಯೇಸುವಿನ ನಾಮದಲ್ಲಿ ಪ್ರಾರ್ಥಿಸುತ್ತೇವೆ ಪರಲೋಕದ ತಂದೆಯೇ.., ಆಮೇನ್!

ಮುಂದುವರಿಯುವುದು...,